​किनवट नगर परिषदेच्या स्वीकृत सदस्यपदी प्रशांत कोरडे यांची बिनविरोध निवड.

 जो मै बोलता हू,ओ मै करता हू..!करण एंड्रलवार  यांच्या उत्स्फूर्त प्रतिक्रिया 

 तालुका प्रतिनिधी ​किनवट :

किनवट नगर परिषदेतील महाविकास आघाडीच्या कोट्यातील रिक्त असलेल्या स्वीकृत सदस्य पदासाठी आज अत्यंत उत्साही वातावरणात निवडणूक प्रक्रिया पार पडली. या निवडणुकीत शिवसेना (उबाठा) गटाचे शहर प्रमुख आणि युवानेते करण एंड्रलवार यांचे खंदे समर्थक प्रशांत सुरेशराव कोरडे यांची स्वीकृत सदस्य म्हणून बिनविरोध निवड झाल्याचे घोषित करण्यात आले.

​जिल्हाधिकारी राहुल कर्डिले यांच्या आदेशानुसार, आज  किनवट नगर परिषदेच्या सभागृहात ही निवड प्रक्रिया पार पडली. महाविकास आघाडीच्या वतीने प्रशांत कोरडे यांचा एकमेव नामांकन अर्ज दाखल झाल्यामुळे पीठासीन अधिकारी तथा नगराध्यक्षा सौ. सुजाता विनोद एंड्रलवार यांनी त्यांची अधिकृत निवड झाल्याची घोषणा केली.

नगरपरिषदेच्या निवडणुकीवेळी करण एंड्रलवार यांनी प्रशांत कोरडे यांना स्वीकृत नगरसेवकपदाचा शब्द दिला होता. आज तो शब्द पूर्ण  केला असुन 'जे बोलतो, ते  करून दाखवतो', हे त्यांनी आपल्या कृतीतून सिद्ध केले आहे. 

प्रशांत कोरडे यांच्या निवडीनंतर राजकीय आणि सामाजिक स्तरातून त्यांच्यावर अभिनंदनाचा वर्षाव होत आहे. यामध्ये नगराध्यक्ष सुजाता विनोद एंड्रलवार,राष्ट्रवादी काँग्रेस (शरद पवार गट) नेत्या सौ. बेबीताई प्रदीप नाईक, शिवसेना जिल्हाप्रमुख ज्योतिबा दादा खराटे, माहूर नगरपंचायतीचे नगराध्यक्ष फिरोज दोसांनी , कपिल प्रदीप नाईक, शिवसेना तालुकाप्रमुख मारुती दिवसे पाटील, राष्ट्रवादीचे तालुकाप्रमुख प्रकाश गब्बा राठोड, माजी नगराध्यक्ष अरुण आळणे यांच्यासह अनेक मान्यवरांनी त्यांचे अभिनंदन केले आहे.

​विकास कामांसाठी कटिबद्ध: प्रशांत कोरडे

निवडीनंतर प्रतिक्रिया व्यक्त करताना प्रशांत कोरडे म्हणाले की, "मी विद्यार्थी दशेपासून शिवसेना (उबाठा) पक्षात निष्ठेने काम करत आलो आहे. पक्षनिष्ठा आणि जनसेवेमुळेच मला आज ही संधी मिळाली आहे. माझ्यावर विश्वास दाखवल्याबद्दल जिल्हाप्रमुख ज्योतिबा दादा खराटे, युवा नेते करण एंड्रलवार,सौ. बेबीताई नाईक, कपिल नाईक आणि सर्व मार्गदर्शकांचा मी ऋणी आहे. उपेक्षित समाजाच्या समस्या सोडवणे आणि किनवट शहराचा सर्वांगीण विकास करणे ही माझी प्राथमिकता राहील."

​प्रशांत कोरडे यांच्या या निवडीमुळे महाविकास आघाडीच्या स्थानिक कार्यकर्त्यांमध्ये आनंदाचे वातावरण असून, शहराच्या विकासाला आता अधिक गती मिळेल, अशी अपेक्षा व्यक्त केली जात आहे.  सभेला उपनगराध्यक्ष हसन लाला, मुख्याधिकारी मुगाची काकडे,कार्यालयीन अधीक्षक अशोक भालेराव यांच्यासह नगरसेवक उपस्थित होते. निवडणुकीनंतर राष्ट्रवादी काँग्रेस पक्ष शरद पवार गट  व शिवसेना उबाठा पक्षाचे पदाधिकारी  आणि कार्यकर्त्यांनी जल्लोष साजरा केला.