किनवट : महिंद्रा प्राइड क्लासरूम व नांदी फाउंडेशन यांच्या संयुक्त विद्यमाने आयोजित तीन दिवसीय कार्यशाळा यशस्वीरित्या संपन्न झाली. या कार्यशाळेद्वारे विद्यार्थ्यांना विविध रोजगाराभिमुख कौशल्यांचे प्रशिक्षण देण्यात आले.
कार्यशाळेसाठी नांदी फाउंडेशनचे मुख्य प्रशिक्षक अक्षय मेश्राम यांनी सलग तीन दिवस विद्यार्थ्यांना प्रभावी मार्गदर्शन केले. कौशल्य विकास केंद्राचे समन्वयक डॉ. सुरेंद्र गट्टानी यांच्या मार्गदर्शनाखाली तसेच स्वामी रामानंद तीर्थ मराठवाडा विद्यापीठाचे सन्माननीय कुलगुरू डॉ. मनोहर चासकर यांच्या आदेशानुसार हा उपक्रम राबविण्यात आला.
आदिवासी भागातील दुर्गम विद्यार्थ्यांना नोकरीच्या संधी उपलब्ध करून देण्यासाठी पूर्वतयारी म्हणून मुलाखत कौशल्य व व्यक्तिमत्व विकासाचे प्रशिक्षण देण्यात आले. विद्यार्थ्यांचा सर्वांगीण विकास व्हावा आणि ते जागतिक स्पर्धेत सक्षमपणे उभे राहावेत, या दृष्टीने विद्यापीठ प्रशासन सातत्याने प्रयत्नशील असल्याचे यावेळी सांगण्यात आले.
विशेष उल्लेखनीय बाब म्हणजे केंद्रातील दोन विद्यार्थिनी—ऐश्वर्या पंढरीनाथ सेलूकर व प्रणाली मारोती मेश्राम—यांची केस स्टडी महिंद्रा प्राइडसाठी निवड करण्यात आली आहे. तसेच त्यांनी केंद्राला चार विशेष पुरस्कार प्राप्त करून दिले असून, ही बाब केंद्रासाठी अभिमानास्पद ठरली आहे.
कार्यशाळेच्या समारोपानिमित्त दिनांक 02 एप्रिल रोजी प्रमाणपत्र वितरण सोहळा आयोजित करण्यात आला. या कार्यक्रमाचे अध्यक्षस्थान केंद्राचे समन्वयक डॉ. नितीन गायकवाड यांनी भूषविले.
यावेळी प्रमुख पाहुणे म्हणून सल्लागार समिती सदस्य डॉ. मार्तंड कुलकर्णी उपस्थित होते. त्यांच्या शुभ हस्ते विद्यार्थ्यांना प्रमाणपत्रांचे वितरण करण्यात आले. विद्यार्थ्यांनी कार्यशाळेत सक्रिय सहभाग नोंदवून कौशल्यविकासाच्या दिशेने महत्त्वपूर्ण पाऊल उचलल्याचे मान्यवरांनी नमूद केले.
कार्यक्रमाचे सूत्रसंचालन प्रा. प्रिती देवस्थळे यांनी केले, तर आभार प्रदर्शन डॉ. योगेश अंबुलगेकर यांनी केले. तसेच या कार्यक्रमाचे नियोजन प्रा. पवार यांनी केले.
हा कार्यक्रम यशस्वी करण्यासाठी केंद्रातील प्राध्यापक डॉ. प्रवीण खंडागळे, डॉ. प्रमोद राठोड, प्रा. चेतन जाधव व प्रा. श्रीकांत दुधारे यांनी विशेष परिश्रम घेतले.
कार्यक्रमास शिक्षकवृंद, कर्मचारी व मोठ्या संख्येने विद्यार्थी उपस्थित होते.
Comments
Post a Comment